花膠燉竹絲雞湯
滋陰養顏
花膠——說穿了就是魚肚，即曬乾的魚鰾，一般只有體形較大的深海魚魚鰾才夠厚，足以曬成花膠。聽到花膠，許多女士都雙眼發光，想著那膠質和骨膠原，自然想大吃特吃。然而講到要自己動手浸煮花膠，卻讓許多人惆悵不已。坊間有許多浸花膠的「秘技」，各師各法，今次採用的是最入門級的一種，將花膠浸過夜，已明顯見到它發大及變得軟身，之後再以薑、葱氽水，待它回溫就可以開始進入下一步驟。
花膠與竹絲雞這個組合，煲又得、燉又得，但燉湯卻更能保留食材真味，當然所需時間可能相差幾倍。
今次以燉湯取代煲湯，最大的不同當然是前者要隔水，所花時間也較久，卻可保留湯料原汁原味和精華。「燉湯，你擺幾多水、幾多材料落去，原盅出返嚟，點解要強調原盅呢？因為你擺乜入去就有乜，但煲湯就唔係，好多嘢都揮發晒，啲水可能係成5倍縮到1倍。另外有樣好大分別，一個濁一個清，燉湯永遠都係清，因為燉嗰時啲嘢冇郁動，純粹用熱氣整到成個湯熟。」
整個湯有滋陰養顏，養血補腎的功效，適合體虛，面色萎黃，易感疲倦，皮膚乾燥的人。
材料
花膠4塊、竹絲雞半隻、
石斛8粒、蜜棗3粒、
酒1茶匙、鹽適量、
薑數片、葱少許、滾水5碗
做法
1. 花膠以凍水浸發過夜，其間可放在雪櫃內。
2. 用薑、葱將花膠氽水10分鐘，蓋上蓋子，待花膠回復至室溫。
3. 竹絲雞斬件，除去內臟及洗淨備用。
4. 再煲滾一鍋熱水，將竹絲雞氽水。
5. 將竹絲雞、石斛、蜜棗及酒等加進燉盅，再倒入滾水至7成滿，蓋上蓋子，以慢火隔水燉3小時。
6. 加入花膠後再慢火燉1小時，加鹽調味，即成。